Norveç Helsinki Komitəsi 8 Mart Beynəlxalq Qadınlar Günü ərəfəsində humanitar jest olaraq Azərbaycan hökumətini həbsdə olan səkkiz qadın jurnalisti girov əvəzində və ya şərti azadlığa buraxmağa çağırıb.

İnsan haqları təşkilatı bildirib ki, Azərbaycan hökuməti tənqidçilərinə qarşı əsassız və cəza məqsədli cinayət ittihamları irəli sürür, ölkədə insan haqları ilə bağlı böhran vəziyyətində "ön cərgədə dayanan" qadın jurnalistlər bunun ağır bədəlini ödəyiblər: "Azərbaycan səkkiz qadın jurnalisti fəaliyyətinə görə həbs edərək misli görünməmiş bir basqıya imza atılıb. Basqınlar, həbslər və əsassız ittihamlarla keçirilən məhkəmə prosesləri təhlükəli bir norma halına gəlib. Ölkənin müstəqillik tarixində heç vaxt bu qədər qadın jurnalist sərt cəzalandırılmayıb. Azərbaycanda müstəqil jurnalistika, xüsusilə qadınlar üçün heç vaxt asan olmayıb".

Bəyanatda vurğulanır ki, həbsdə olan qadın jurnalistlərin bəzilərinin ciddi sağlamlıq problemləri var və onlar təcili tibbi yardıma ehtiyac duyurlar. "Məhkəmə istintaqı zamanı saxlandıqları şərait səbəbindən həyatları təhlükə altındadır. Təhlükəsiz olmayan həbsxana şəraiti, adekvat tibbi xidmətə çıxışın çətinliyi onların sağlamlığı və rifahı üçün ciddi risklər yaradır. Onların bəziləri ailə üzvlərinə baxan əsas şəxslər, analar, ailənin yeganə qazanc təminatçısıdır və ailə məsuliyyəti daşıyırlar".

"Bu mühüm günün (8 Mart) yaxınlaşması ilə Azərbaycan hökuməti öz hərəkətlərini söylədikləri ilə uyğunlaşdırmaq fürsəti əldə edir... Azərbaycanın beynəlxalq tərəfdaşları da bu fürsəti dəyərləndirərək humanitar əsaslarla onların azadlığa buraxılması üçün səylərini gücləndirməli və Beynəlxalq Qadınlar Gününün həqiqi ruhunu dəstəkləməlidirlər", - Norveç Helsinki Komitəsi bəyanatında bildirilir.

Xatırlatma

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bir çoxunun ittihamı ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 300-dən çox siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Amma beynəlxalq insan haqları qurumları da hökuməti haqsız tutulanları azad etməyə çağırır.

ABŞ prezidenti Donald Tramp USAID-in fəaliyyətinin dayandırılması ilə bağlı səsləndirilən tənqidlərə baxmayaraq, milyarder işadamı İlon Maskı öz administrasiyasında Dövlət İdarəetməsinin Səmərəliliyi Departamentinin (DOGE) rəhbəri təyin etmə qərarını müdafiə edib.

Tramp yanvarın 24-də ABŞ Beynəlxalq İnkişaf Agentliyinin (USAID) fəaliyyətini məhdudlaşdırıb və üç ay müddətinə ABŞ-nin xaricə yardımlarını dayandırıb.

Tramp və Mask fevralın 18-də "Fox News"da yayımlanan ilk birgə televiziya müsahibəsində bu addımı müzakirə ediblər. Tramp USAID-in maliyyəsini dondurmaq qərarını əvvəlki Bayden administrasiyasının çox xərcləməsi, bu xərclər arasında Birləşmiş Ştatların maraqlarına xidmət etməyən xarici yardımların olması və büdcə kəsirinin artması ilə əlaqələndirib.

Müsahibə daha çox Trampın dünyanın ən zəngin adamı Mask ilə münasibətinə və niyə onu DOGE-yə rəhbər təyin etməsinə fokuslanıb.

"Bir çox işadamını tanıyıram, amma onların hamısı mütləq yaxşı insanlar deyil", –Tramp bildirib. O deyib ki, Mask ölkənin yaxşı vəziyyətdə olmasını istəyən "böyük" insandır.

Prezidentin sözlərinə görə, DOGE hökumət israfçılığını, saxtakarlığı və sui-istifadəni aradan qaldırıb, amerikalı vergiödəyicilərin milyonlarla dollarını xilas edib.

Trampın yanvarda baş tutan andiçmə mərasimindən bəri DOGE hər bir nazirlikdə yoxlamalar apararaq federal hökumətin ölçüsünü kiçiltmək və xərcləri azaltmaq məqsədilə minlərlə hökumət işçisini işdən çıxarıb.

"Məqsəd kəsirdən bir trilyon dollar çıxarmağa çalışmaqdır" deyən Mask Trampın hakimiyyətə gəldiyi zaman iki trilyon dollarlıq büdcə kəsiri ilə üzləşdiyini iddia edib.

Tramp müsahibədə bildirib ki, Mask ondan öz şirkətləri üçün – xüsusən ABŞ hökuməti ilə bir neçə müqaviləsi olan "SpaceX" və elektrikli avtomobillərin təşviqi məqsədilə ABŞ subsidiyalarından faydalanan "Tesla" üçün heç nə xahiş etməyib.

Mask isə əgər öz şirkətləri ilə əlaqəli bir vəziyyətlə üzləşsə, özünü bu məsələdən kənarlaşdıracağını bildirib. Tramp isə əlavə edib: "Əgər bir münaqişə yaranarsa, o, bu məsələyə qarışmayacaq".

Həbsdə olan media eksperti Ələsgər Məmmədli təsisçisi olduğu "Toplum" İnternet Televiziyası ilə bağlı açılmış cinayət işinin istintaq materialları ilə tanış olub və "məhkəmədə azacıq ədalət olacağı təqdirdə bütün ittihamları puç edəcəyinə inanır".

Bunu fevralın 18-də Ə.Məmmədli ilə telefonda danışan qardaşı Nəsimi Məmmədli bildirib: "Ələsgər bəy bildirdi ki, 11 aydan çoxdur davam edən istintaq yekunlaşıb. Həbsinin qanunsuz olmasına etiraz əlaməti olaraq bu müddət ərzində heç bir ifadə verməyib".

Qardaşının sözlərinə görə, hər biri 300 vərəqdən ibarət olmaqla 23 cild qovluq, əlavə qeydlər və ifadələrlə birlikdə ümumilikdə 10 min səhifədən çox istintaq materialları ilə tanış olmaq üçün beş gün sərf edib.

"Deməsinə görə, 50 nəfərdən çox şəxs istintaqa çağrılıb və dindirilib. Bütün ifadələrlə tanışdır. İstintaq materiallarının özü ilə bağlı hissələrindən və prosessual pozuntulardan ibarət 21 qeyd götürüb. Hər biri ilə bağlı əminliklə bildirdi ki, onun həbsdə saxlanması tamamilə qanunsuzdur", - N.Məmmədli bildirib.

Bu fikirlərə istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.

19 dekabr

'Həbsxanada Ələsgər Məmmədlinin səhhəti pisləşib'

Vəkil Fəxrəddin Mehdiyev dekabrın 18-də Bakı İstintaq təcridxanasında "Toplum" İnternet Televiziyasının hüquqi təsisçisi Ələsgər Məmmədli ilə görüşüb.

Bu barədə AzadlıqRadiosuna Ə.Məmmədlinin qardaşı Nəsimi Məmmədli bildirib: "Ələsgər bəy halsız olub. Bədəninin müxtəlif nahiyələrində ağrılardan şikayətlənib. Təcridxanada götürülən qan analizlərinin və ultrasəs müayinəsinin nəticəsi də narahatlığını artırıb. Ödündə qatılaşma, böyrəyində daş var. Qan təzyiqi qeyri-sabitdir. Fasiləsiz baş ağrısından və yuxusuzluqdan əziyyət çəkir. Qalxanabənzər vəzindəki şiş boğulma hissini artırıb".

N.Məmmədlinin əlavə etməsinə görə, Ə.Məmmədlinin təcili cərrahi əməliyyat olunması lazımdır, son günlər ürəyində də problemlər yaranıb.

"10 aydır həbsxanadadır. Qanunsuz həbs edilməsi bir yana, xəstəliklərinin müalicəsi üçün ev dustaqlığına da buraxmırlar. Təəssüf ki, ölkədə məhkəmə-hüquq sistemi təqsirsiz insanların cəzalandırılması alətinə çevrilib", - daha sonra o vurğulayıb.

Ə.Məmmədlinin yaxınları bundan əvvəl də bir neçə dəfə onun səhhəti ilə bağlı narahatlıqlarını ifadə ediblər.

Bu açıqlamaya, hələlik, Penitensiar Xidmət və ya başqa rəsmi qurumlardan münasibət almaq mümkün olmayıb.

Ə.Məmmədli bu il martın 8-də həbs olunub. Xətai rayon Məhkəməsi onun barəsində 4 aylıq həbs-qətimkan tədbiri seçib. Daha sonra qətimkan tədbirinin müddəti uzadılıb.

Ə.Məmmədli Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ittiham olunur. O, özünü təqsirli bilmir və həbsini peşə fəaliyyəti ilə əlaqələndirir.

Xatırlatma

Ümumilikdə ötən ilin noyabrından başlayaraq Azərbaycanda qruplar halında 30-a yaxın jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 330 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Avropa İnsan Hüquqları Məhkəməsi (AİHM) keçmiş Milli Televiziya və Radio Şurasının 2010-cu ildə "Obyektiv Radio"ya yayım hüququ verməkdən imtina etməsini ifadə azadlığının pozuntusu kimi dəyərləndirib.

""Obyektiv" Televiziya və Radio Yayım Şirkəti və başqaları Azərbaycana qarşı" işinin detallarına görə, ərizəçilər – "Obyektiv Radio", onun təsisçiləri Mehman Əliyev və Emin Hüseynov, habelə "Alternativ Radio"nun təsisçisi Rəsul Cəfərov 2010-cu ildə 103.3 FM radio tezliyi üzrə yayım lisenziyası üçün tenderə qatılıblar.

Keçmiş Milli Televiziya və Radio Şurasının (MTRŞ) keçirdiyi tenderin qalibi isə "Golden Prince LLC" şirkəti ("Azad Xəbər" radiosu) elan olunub.

Tenderin nəticələri ilə razılaşmayan ərizəçilər yerli məhkəmələrə üz tutaraq MTRŞ-ni inhisarçılıq və müstəqil mediaya qərəzlilikdə günahlandırıb nəticələrin ləğvini istəsələr də, onların şikayətləri təmin edilməyib.

Ərizəçilər Strasburq Məhkəməsi qarşısında iddia ediblər ki, MTRŞ-nin qərarı onların ifadə azadlığına özbaşına müdaxilə təşkil edib. Onlar bunu "qüsurlu prosedur", "şəffaflıq və məntiqi əsaslandırmanın olmaması" ilə izah ediblər.

Məhkəmə işinin kommunikasiyası zamanı R.Cəfərov və hökumət dostca razılaşma əldə ediblər. Razılaşmaya əsasən, Cəfərov ərizəsini geri götürməyi, hökumət isə ona 3 min avro kompensasiya ödəməyi öhdəsinə götürüb.

Digər ərizəçilər – "Obyektiv Radio", onun təsisçiləri M.Əliyev və E.Hüseynov isə şikayətlərini davam etdiriblər.

AİHM fevralın 18-də açıqladığı qərarında ərizəçilərə münasibətdə ifadə azadlığının pozuntusunu tanıyıb. Qərara əsasən, hökumət ərizəçilərə mənəvi zərərə görə 4 min 500 avro, xərclərə görə isə 2 min avro məbləğində kompensasiya ödəməlidir.

Milli Televiziya və Radio Şurası (MTRŞ) 2002-ci ildə təsis edilib. Daha sonra onun əsasında Azərbaycan Audiovizual Şurası yaradılıb.

Yanvarda İranın cənub-şərqində saxlanılmış britaniyalı cütlük casusluqda ittiham edilir və Qərb kəşfiyyat xidmətləri ilə əlaqədə olmaqda günahlandırılır.

İranın ədliyyə qurumunun sözçüsü Əsgər Cahangir fevralın 18-də bildirib ki, "iki Britaniya vətəndaşı casusluq ittihamı ilə həbs edilib". Onun sözlərinə görə, Kirman vilayətində saxlanılan bu cütlüyün düşmən və Qərb ölkələrinin kəşfiyyat xidmətlərinə bağlı gizli qurumlarla əməkdaşlıq etdiyi müəyyənləşib.

İran tərəfi bildirib ki, "şəxslər turist adı altında İrana daxil olub və araşdırma aparmaq adı altında ölkənin müxtəlif bölgələrində məlumat toplayıblar".

Ötən həftə Britaniya mətbuatı İranda saxlanılan britaniyalı cütlüyün adlarını açıqlamışdı. Onlar 50 yaşlarında olan Kreyq və Lindsi Formandır.

Britaniyalı cütlük ötən il dekabrın 30-da Ermənistandan İrana keçib. Dünya üzrə motosiklet səyahətinin bir hissəsi kimi onlar İranda cəmi beş gün qalmağı planlaşdırıbmış.

Böyük Britaniya Xarici İşlər Nazirliyi britaniyalı vətəndaşlara İrana səyahət etməmələrini tövsiyə edir.

"Təkcə Britaniya pasportunun olması və ya Birləşmiş Krallıqla əlaqələr İran hakimiyyətinə sizi həbs etmək üçün kifayət qədər səbəb verə bilər", - XİN-in rəsmi xəbərdarlığında bildirilir.

Prezident İlham Əliyev yenidən Milli Olimpiya Komitəsinin (MOK) prezidenti seçilib.

Bu gün, fevralın 18-də MOK-un IX Hesabat-seçki baş məclisi keçirilib. Orada dövlət başçısı İlham Əliyev növbəti 4 il müddətinə qurumun rəhbəri seçilib.

Azərbaycan Milli Olimpiya Komitəsi 1992-ci ildə yaradılıb.

İ.Əliyev ilk dəfə 28 il öncə, 1997-ci il iyulun 31-də Milli Olimpiya Komitəsinin rəhbəri seçilib. O, o vaxtdan bəri bu postu tutur. Həmin vaxt ölkəyə onun atası Heydər Əliyev rəhbərlik edirdi. İ.Əliyev az sonra Azərbaycan Dövlət Neft Şirkətinin birinci vitse-prezidenti postuna da gətirilmişdi. O, 2003-cü ildən isə ölkəyə rəhbərlik edir.

Rusiya tərəfi fevralın 7-də Moskvada narkotik ittihamı ilə saxlanılmış ABŞ vətəndaşı Kalob Bayersi azad edib. Fevralın 17-si gecə saatlarda açıqlanan bu addım Səudiyyə Ərəbistanındakı danışıqlar ərəfəsində ABŞ-Rusiya gərginliyini azaltmağa yönəlmiş növbəti cəhd kimi görünür. Bu, eyni zamanda, Vaşinqtonun Ukraynada müharibənin dayandırılmasına dair diplomatik səylərini gücləndirdiyi bir vaxta təsadüf edir.

"The New York Times" Kreml rəsmisinə istinadən yazır ki, qarşıdakı danışıqlar ikitərəfli münasibətləri yaxşılaşdırmağa yönəlib, "bu səbəbdən bəzi hadisələr bu kontekstdə dəyərləndirilə bilər".

"The Associated Press"in məlumatına görə, Bayersin nümayəndələri onun hazırda ABŞ səfirliyində olduğunu və vətəninə qayıtmağı gözlədiyini bildiriblər. Qeyd olunub ki, o, məhbus mübadiləsi çərçivəsində deyil, birbaşa azadlığa buraxılıb.

Gömrük xidmətinin əməkdaşları Moskva hava limanında 28 yaşlı Bayersin baqajında çətənə tərkibli marmelad aşkar etdiklərini bildirdikdən sonra Rusiya məhkəməsi onun narkotik qaçaqmalçılığı ittihamı ilə həbsdə saxlanılmasına qərar verib. Məhkəmənin Telegram paylaşımına görə, ona qarşı irəli sürülən ittiham üzrə 7 ilə qədər həbs cəzası nəzərdə tutulur.

Azər Qasımov Azərbaycan Prezidentinin Mətbuat katibi vəzifəsindən azad edilib.

Bununla bağlı bu gün, fevralın 17-də prezident İlham Əliyev sərəncam imzalayıb.

58 yaşlı A.Qasımov 2004-cü ildən sözügedən vəzifəni tuturdu.

O, daha əvvəl isə Milli Məclis Aparatının Beynəlxalq münasibətlər şöbəsinin müdiri olub.

Bir çox kütləvi informasiya vasitələrinin (KİV) təmsilçiləri Azərbaycanda, bir qayda olaraq, əksər dövlət qurumun mətbuat xidmətləri kimi, Prezidentin Mətbuat xidməti ilə də əlaqə saxlamağın çətinliyindən şikayətlənirlər. Şikayətlərə görə, onlar KİV-lərə lazımı qədər açıq deyillər. Amma onların özləri belə fikirləri qəbul etmirlər.

Bu il Həcc ziyarətində qiymətdə artım, kvotada isə azalma var.

Qafqaz Müsəlmanları İdarəsindən (QMİ) yayılan məlumata görə, bir nəfər üçün ziyarət paketinin qiyməti 5 min 950 ABŞ dolları təşkil edir. Ziyarət vahid formada təşkil olunacaq və hava nəqliyyatı ilə həyata keçiriləcək.

İdarə ötən il bildirmişdi ki, bir nəfər üçün ziyarət paketinin qiyməti 5 min 850 ABŞ dollarıdır.

Ümumiyyətlə, son altı ildə ziyarətin qiyməti 1 min 400 dollardan çox artıb.

APA-nın xəbərinə görə isə, QMİ Xarici əlaqələr şöbəsindən onlara bildirilib ki, kvotanın sayı dəqiq təyin edilməyib: "Keçən ilə nəzərən bu il kvota az nəzərdə tutulub".

Azərbaycanda Həcc ziyarətini QMİ təşkil edir. Son illər Azərbaycanda zəvvarların sayında azalma, qiymətdə bahalaşma var.

Söhbət Səudiyyə Ərəbistanının Məkkə şəhərində Kəbənin ziyarətindən gedir.

Rusiyaya məxsus pilotsuz uçuş aparatı Çernobıl Atom Elektrik Stansiyasındakı struktura (AES) zərbə endirib.

Ukrayna prezidenti Volodimir Zelenski fevralın 14-də bildirib ki, Rusiya qüvvələrinə məxsus dron Çernobıl AES-dəki qoruyucu sarkofaqa (beton izolyasiya örtüyü) zərbə endirib və onu "əhəmiyyətli dərəcədə" zədələyib. Lakin AES-də radiasiya səviyyəsində dəyişiklik qeydə alınmayıb.

Zelenski qeyd edib ki, zərbə nəticəsində zədələnən beton sarkofaq Çernobılın dağılmaqda olan dördüncü reaktorunun üzərini örtürdü. O, Rusiyanı belə hücumun mümkün nəticələrinə "tamamilə" etinasız yanaşmaqda ittiham edib.

Beynəlxalq Atom Enerjisi Agentliyi (BAEA) zədələnməni təsdiqləyib.

Zelenski hücumu "bütün dünyaya terror təhdidi" kimi xarakterizə edib.

Zelenskinin bəyanatı ABŞ prezidenti Donald Trampın müharibəni dayandırmaq üçün rusiyalı həmkarı Vladimir Putinlə danışıqlar aparması səyləri fonunda verilib.

Zelenski bildirib ki, Rusiya hər gecə Ukraynanın infrastrukturuna və şəhərlərinə belə hücumlar həyata keçirir. O, Putini danışıqlara hazırlaşmamaqda ittiham edib.

"O, dünyanı aldatmağa davam etməyə hazırlaşır", – Zelenski vurğulayıb.

Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaya Kallas da hadisəyə münasibət bildirib.

Aİ-nin baş diplomatı X sosial şəbəkəsindəki paylaşımında Rusiyanı Çernobıl nüvə obyektinə yenidən "məsuliyyətsiz şəkildə" hücumda günahlandırıb.

"Mülki nüvə obyektlərinə edilən belə hücumlar yolverilməzdir. Bu, bir daha sübut edir ki, Rusiya sülh axtarmır", - Aİ rəsmisi vurğulayıb.

"Hərbi vəzifə və hərbi xidmət haqqında" Qanunun tələblərinin pozulmasına görə toplanan cərimələrin 50 faizi hərbi qulluqçuların aylıq vəzifə maaşlarına əlavə ediləcək.

Bu, Milli Məclisin bu gün, fevralın 14-də keçirilən iclasında müzakirəyə çıxarılan "Hərbi vəzifə və hərbi xidmət haqqında" Qanuna təklif edilən dəyişiklikdə əksini tapıb.

Qanun layihəsi səsverməyə çıxarılaraq birinci oxunuşda qəbul edilib.

Belə hal Azərbaycanda birinci dəfə deyil ki, həyata keçirilir. Bundan əvvəlki illərdə də müxtəlif sahələr üzrə toplanan cərimələrin müəyyən qisminin həmin sahələrdə çalışan qulluqçuların əmək haqlarına əlavə edildiyi açıqlanıb. Onlardan biri də yol polis əməkdaşları olub.

Son illər Azərbaycanda cərimə və rüsumların məbləği də, bir qayda olaraq, artırılır.

Yeri gəlmişkən, Milli Məclisdə fevralın 14-də müzakirəyə çıxarılan İnzibati Xətalar Məcəlləsinə və "Hərbi vəzifə və hərbi xidmət haqqında" Qanuna təklif edilən dəyişikliklərdə də bir sıra məsələlərlə bağlı cərimələrin, əsasən, 50 faiz artırılması nəzərdə tutulur.

Amma ildə vətəndaşların ödədiyi cərimələrin ümumi məbləği açıqlanmır. Bununla belə, ötən ilin sonunda maliyyə naziri bildirmişdi ki, büdcə təşkilatlarından 840 milyon manat daxil olma proqnozlaşdırılır: "Bunların əksəriyyəti cərimələrdir. Əsas vəsait bir neçə qurumun payına düşür. Birinci yerdə Daxil İşlər Nazirliyidir, ən çox cərimə onlardan daxil olur. İkinci yerdə İqtisadiyyat Nazirliyi gəlir. Bu nazirliyin tərkibində də bir çox qurumlardan cərimələr büdcəyə daxil olur. Dövlət Gömrük Komitəsinin, Qida Təhlükəsizliyi Agentliyinin və Ekologiya və Təbii Sərvətlər Nazirliyinin burada payı var".

Lakin bəzi müstəqil ekspertlər cərimələrin bir hissəsinin vəzifə maaşlarına əlavə edilməsini düzgün saymırlar. Onların fikrincə, bu, əsassız şəkildə vətəndaşların cərimələnməsinə yol aça bilər. Üstəlik, onlar düşünür ki, bu, hökumətin əməkhaqqı siyasətində balansın pozulmasına gətirib çıxarır.

"Human Rights Watch" (HRW) beynəlxalq insan haqları təşkilatı fevralın 14-də yaydığı məlumatda bildirib ki, İran hakimiyyəti 2024-cü ilin oktyabrından etibarən azı 24 türk (azərbaycanlı) fəala ağır həbs cəzaları verib.

Tehran Apellyasiya Məhkəməsinin 36 nömrəli şöbəsi Tehranın İslam İnqilab Məhkəməsinin 15-ci şöbəsinin hakimi Əbolqasem Salavatinin çıxardığı hökmü qüvvədə saxlayaraq, 10 türk (azərbaycanlı) fəala qarşı sərt həbs cəzalarını təsdiqləyib. Onlar "dövlət əleyhinə təbliğat", "milli təhlükəsizliyə qarşı fəaliyyət məqsədilə toplaşma və əlbir olmaq" və "casusluq" ittihamları ilə məhkum ediliblər. Verilən həbs cəzalarının müddəti 3 ildən 14 ilə qədər dəyişir.

"İran hakimiyyəti vətəndaş cəmiyyətini və etnik azlıqları susdurmaq üçün sistemli şəkildə əsassız ittihamlar irəli sürür və ağır həbs cəzaları tətbiq edir. Bu repressiyalar vətəndaş cəmiyyətini əzmək və etnik azlıqların fundamental hüquqlarını tələb etməsinin qarşısını almaq məqsədi daşıyır", – "Human Rights Watch"un İran üzrə tədqiqatçısı Nahid Naqşbəndi bildirib.

10 azərbaycanlı aktivistin işi üzrə məhkəmə qərarına əsasən, Ayaz Seifxah 14 il, Araz Aman Zeynabad və Baqir Hacızadə Məzrə 13 il, Kərəm Mərdanə Müstəlibəyli 11 il, Tahir Nəqəvi və Mürtəza Pərvin Coda 6 il, Salar Tahir Əfşar, Fatimə Atəş Xiyavi və Səid Minai Qışlaq 5 il, Həsən İbrahimi isə 3 il həbs cəzasına məhkum edilib.

Məlumatlı bir mənbə HRW-yə bildirib ki, hakimiyyət orqanları irəli sürülən ittihamları əsaslandırmaq üçün heç bir sübut təqdim etməyib və həmin şəxslərin əvvəlki fəaliyyətləri əsas gətirilib. Vəkil Tahir Nəqəvinin işi üzrə hakimiyyət orqanları əlavə olaraq onun 2022-ci il etirazları zamanı öldürülən və ya yaralanan etirazçıların ailə üzvlərini müdafiə etməsini də sənədləşdirib.

Evin həbsxanasında saxlanılan T.Nəqəviyə tibbi yardım göstərilməkdən imtina edilib. Məlumatlı bir mənbə deyib ki, T.Nəqəvi ciddi sağlamlıq problemlərindən əziyyət çəkir və "hətta həbsxana klinikası onun üçün ixtisaslaşmış tibbi yardım tövsiyə etsə də, hakimiyyət bu tövsiyələri yerinə yetirməkdən imtina edir".

Başqa bir iş üzrə Təbrizin İslam İnqilab Məhkəməsinin 15-ci şöbəsi 13 fəalı son müdafiə üçün çağırıb. Mənbələr bildirib ki, bu fəallar 2023-cü ilin sentyabr və noyabr ayları arasında həbs edilib və günlərlə təkadamlıq hücrələrdə saxlanılıb, burada onlara etiraf etmək üçün psixoloji təzyiq göstərilib.

Bu fəallar Araz İbrahimnejad, Davud Şiri, Mehrdad Qadiri, Yürüş Mehrəlibəyli, Hamid Yeganəpur, Məhəmmədrza Müvəhhid, Əmirhüseyn Ağayi, Əli Babayi, Cavad Sudbər, Mürtəza Nurməhəmmədi, Hüseyn Azadi, Nasir Razmcu və İbrahim Əvəzzadədir. Onlara "müxalifət qrupuna üzvlük" və "ölkə əleyhinə qəsdçilik" ittihamları irəli sürülüb.

2024-cü il oktyabrın 1-də Tehranın İslam İnqilab Məhkəməsinin 15-ci şöbəsi vəkil Seyid Məhəmməd Rza Fəqihiyi "milli təhlükəsizliyə qarşı cinayət törətmək məqsədilə sui-qəsd" ittihamı ilə 5 il həbs cəzasına və 2 il müddətinə vəkillik fəaliyyəti aparmaqdan məhrum edib. İttihamlar 2022-ci il İran ümummilli etirazları zamanı onun Tehranda İran Mərkəzi Vəkillər Birliyinin qarşısında keçirilən mitinqdə iştirakı və 2022-ci il etirazçıları ilə yanaşı, digər insan hüquqları müdafiəçilərini hüquqi olaraq müdafiə etməsi ilə bağlıdır. 2025-ci il yanvarın 21-də o, 5 illik həbs cəzasını çəkmək üçün Evin həbsxanasına köçürülüb.

"Human Rights Watch"un İran üzrə tədqiqatçısı N.Naqşbəndi bildirib ki, İran hakimiyyəti etnik və dini azlıqların hüquqlarını müdafiə edən hər kəsi hədəf alır, onları separatçılıqla günahlandırır və əsassız ittihamlarla cəzalandırır.

"Turan" İnformasiya Agentliyi fəaliyyətini dayandırıb. Bu barədə fevralın 13-də "Turan"ın direktoru Mehman Əliyev agentliyin kollektivi adından müraciətində bildirib. Vurğulayıb ki, 30 ildən artıq bir müddətdə "Turan" müstəqil jurnalistikanın dayağı olub, siyasi və iqtisadi qeyri-sabitlik şəraitində obyektiv, etibarlı xəbərlər təqdim edib: "1990-cı ildə - Sovet İttifaqının son günlərində yaradılan agentliyimiz keçid dövrünün çətinliklərindən, müharibə və islahatlar dövrlərindən keçərək ictimai maraqları qorumağa sadiq qalıb".

O əlavə edib ki, indi qaçılmaz bir reallıqla üzləşiblər: "Daimi maliyyə çətinlikləri səbəbindən informasiya fəaliyyətimizi hazırkı formatda davam etdirmək mümkün deyil. ...bizi uzun illər təqib edən maliyyə çətinlikləri, nəhayət, agentliyin fəaliyyətini mövcud formatda dayandırmaq barədə ağır qərar qəbul etməyə məcbur etdi".

Amma M.Əliyevin sözlərinə görə, bu, onların missiyalarının sonu deyil: "Əksinə, yeni bir inkişaf mərhələsidir. İnformasiya məkanı sürətlə dəyişir və biz də bu dəyişikliklərə uyğunlaşmağın vacibliyini anlayırıq. Qarşıdakı aylarda biz xəbər yayımı ilə yanaşı, dünyanın, regionun və ölkəmizin proseslərini təhlil edən, əsas problemləri müəyyən edib həll yolları göstərən yeni bir format üzərində işləyəcəyik. Müasir jurnalistikanın gələcəyi təkcə xəbər vermək deyil, həm də ictimai rəyi formalaşdırmaqdır".

Bəs "Turan"ın yeni formatda oxucularla görüşü nə vaxt gerçəkləşəcək? M.Əliyev AzadlıqRadiosuna açıqlamasında dəqiq vaxt söyləməyib.

O, təzyiqlərlə bağlı suala isə belə cavab verib: "Medianın iqtisadi dayaqlarının vurulması özü-özlüyündə siyasi təzyiqdir".

"Turan" İA 1990-cı ildə, SSRİ-nin süqutundan bir il öncə yaradılmışdı. Azərbaycan onda hələ SSRİ tərkibində müttəfiq respublikalardan biri idi. 1990-cı illər Azərbaycanda yenidən müstəqil medianın yaranma dövrü kimi dəyərləndirilir.

Moldova hökumətinin qərarı ilə ölkədəki Rusiya Elm və Mədəniyyət Mərkəzi (Rus Evi) bağlanacaq. Fevralın 13-də Moldova Xarici İşlər Nazirliyinin (XİN) mətbuat xidmətinin yaydığı məlumatda bildirilib ki, müvafiq qərar Rusiyanın hücum təyinatlı pilotsuz uçuş aparatının ölkənin hava məkanını pozmasına cavab olaraq qəbul edilib.

Moldova XİN 1998-ci ildə imzalanmış mədəniyyət mərkəzlərinin yaradılması və fəaliyyəti haqqında Moldova-Rusiya hökumətlərarası sazişini birtərəfli qaydada denonsasiya etmək qərarına gəlib. "Müqavilənin ləğvi proseduru başa çatdıqdan sonra Rusiya Mədəniyyət Mərkəzi ölkəmizdə fəaliyyətini dayandıracaq", - XİN-in bəyanatında deyilir.

Daha əvvəl Moldova prezidenti Maya Sandu bildirib ki, Rusiyaya məxsus dronların Ukraynanın Odessa vilayətinə hücumu zamanı onlardan ikisi Moldova ərazisinə daxil olub və partlayıb. Partlayış nəticəsində ölən və yaralananlar olmayıb.

Bu gün, fevralın 13-də Rusiya səfiri Oleq Ozerov təcili Moldova XİN-ə çağırılıb. Ona pilotsuz uçuş aparatının qalıqları göstərilib.

Buna da bax:

Rusiyalı deputatın Azərbaycana girişinə qadağa qoyuldu

Fevralın 12-də Bakı Apellyasiya Məhkəməsində "MeydanTV işi" üzrə həbs olunmuş jurnalist Ramin Cəbrayılzadənin (Deko) şikayəti ilə bağlı məhkəmə prosesi keçirilib.

Müdafiə tərəfi R.Dekonun həbsinin ev dustaqlığı ilə əvəzlənməsi ilə bağlı vəsatətin təmin olunmaması qərarından apellyasiya şikayəti vermişdi.

Bu barədə vəkil Nemət Kərimli məlumat verib. O qeyd edib ki, məhkəmə şikayəti təmin etməyib: "Prosesdə Ramin Deko heç bir cinayət törətmədiyini, öz jurnalist fəaliyyətinə görə həbs edildiyini deyib".

4 fevral

Ramin Deko da evə buraxılmadı

Fevralın 4-də Xətai rayon Məhkəməsində "MeydanTV işi" üzrə həbs edilən jurnalist Ramin Cəbrayılzadənin (Deko) ev dustaqlığına buraxılması ilə bağlı müdafiə tərəfinin vəsatətinə baxılıb.

Məhkəmə vəsatəti təmin etməyərək jurnalist haqqında qətimkan tədbirini dəyişməyib.

Müdafiə tərəfi qeyd edir ki, vəsatət üçün əsas istintaq hərəkətlərin aparılmaması olub.

"Həbs-qətimkan tədbirin özü də heç bir sübut, dəlil olmadan seçilib. Hazırda da heç bir istintaq hərəkəti aparılmır. Biz hesab edirik ki, belə olan halda Ramin Cəbrayılzadənin həbsdə qalması üçün heç bir əsas yoxdur. Təəssüf ki, məhkəmə vəsatətimizi təmin etməyib", - vəkil Nemət Kərimli vurğulayıb.

Vəkilin sözlərinə görə, məhkəmədə R.Deko həbsini jurnalist fəaliyyəti ilə əlaqələndirib.

R.Cəbrayılzadə ötən il dekabrın 6-da saxlanılıb. Həmin gün beş jurnalist - Aynur Elgünəş, Xəyalə Ağayeva, Aytac Tapdıq, Aysel Umudova, Natiq Cavadlı də saxlanılıb. Onların hər biri barəsində Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb və 4 aylıq həbs-qətimkan tədbiri seçilib.

30 yanvar

Aytac Əhmədovanın apellyasiya şikayəti təmin edilmədi

Yanvarın 30-da Bakı Apellyasiya Məhkəməsində "MeydanTV işi" üzrə həbs olunmuş jurnalist Aytac Əhmədovanın (Tapdıq) şikayətinə baxılıb.

Hakim Elbəyi Həsənovun sədrliyi ilə keçirilən prosesdə jurnalist barəsində seçilmiş həbs-qətimkan tədbirini ev dustaqlığı ilə əvəzlənməsi haqqında vəsatətin Xətai rayon Məhkəməsində təmin edilməməsi ilə bağlı qərardan şikayətə baxılıb.

Vəkil Cavad Cavadov bildirib ki, şikayət təmin edilməyib: "Aytac Tapdıq özü də məhkəmədə iştirak edib. O bildirdi ki, 10 ildən çoxdur MeydanTV ilə əməkdaşlıq edir və onun həbsi sırf jurnalist fəaliyyətinə görədir. Biz də hesab edirik ki, burada Avropa İnsan Hüquqları Konvensiyasının 18-ci (Hüquqlarla bağlı məhdudlaşdırmalardan istifadənin hədləri) maddəsinin pozuntusu açıq-aşkardır. Obyektiv əsaslar olsa da, istintaq və məhkəmələr onun barəsində həbslə bağlı olmayan qətimkan tədbiri seçmirlər".

Vəkil qeyd edib ki, məhkəmə qərarından Avropa İnsan Hüquqları Məhkəməsinə şikayət veriləcək.

24 yanvar

Jurnalist Aysel Umudova da evə buraxılmadı

"MeydanTV işi" üzrə həbs olunmuş jurnalist Aysel Umudova ev dustaqlığına buraxılmayıb.

Vəkil Aqil Layıc bildirib ki, A.Umudovanın ev dustaqlığına buraxılması ilə bağlı Xətai rayon Məhkəməsinə müraciət etmişdi və məhkəmə bu gün, yanvarın 24-də vəsatəti təmin etməyib: "Biz bilirdik ki, qərar belə olacaq. Sadəcə bu bir prosedurdur ki, Avropa İnsan Hüquqları Məhkəməsinə müraciət etməyimiz üçün ondan keçməliyik".

Müdafiə tərəfindən bildirildiyinə görə, A.Umudova məhkəməyə heç vaxt istintaqdan yayınmadığını, şahidlərə təsir etmədiyini deyib, ona görə də onu həbsdə saxlamağa əsas yoxdur: "O şərləndiyini bildirib, həbsini jurnalistika fəaliyyətinə bağlayır".

23 yanvar

Məhkəmə jurnalist Aytac Tapdığı da ev dustaqlığına köçürməkdən imtina edib

Yanvarın 23-də Bakının Xətai rayon Məhkəməsi MeydanTV ilə əməkdaşlıq etdiyi bildirilən jurnalist Aytac Tapdıqın ev dustaqlığına köçürülməsi haqqında vəsatəti təmin etməyib. Bu barədə vəkil Cavad Cavadov bildirib.

Müdafiə tərəfi hesab edir ki, jurnalistin həbsdə saxlanması üçün əsas yoxdur, ona qarşı irəli sürülmüş qaçaqmalçılıq ittihamları uydurmadır.

A.Tapdıq özü jurnalist fəaliyyətinə görə təqib edildiyini bildirib. Müdafiə tərəfi jurnalisti ev dustaqlığına və ya girov əvəzində azadlığa buraxmağı xahiş edib. Lakin məhkəmə onu həbsdə saxlayıb.

17 yanvar

'MeydanTV işi' üzrə həbs olunan jurnalistlərin şikayəti təmin edilməyib

"Meydan" televiziyası ilə əməkdaşlıq etdiyi bildirilən jurnalistlərdən Aynur Qəmbərova (Elgünəş) və Natiq Cavadlının həbs-qətimkan tədbirinin ev dustaqlığı ilə əvəzlənməsi ilə bağlı vəsatəti təmin olunmayıb.

Vəkil Elçin Sadıqovun verdiyi məlumata görə, müdafiə tərəfindən verilmiş vəsatət yanvarın 17-də Xətai rayon Məhkəməsində baxılıb.

Vəkil qeyd edib ki, məhkəmədə A.Qəmbərova jurnalist fəaliyyətinə görə həbs olunduğunu deyib və həbsini siyasi motivli adlandırıb.

E.Sadıqov bildirib ki, məhkəmə qərarından apellyasiya şikayəti veriləcək.

Ötən il dekabrın 8-də Xətai rayon Məhkəməsində "MeydanTV işi" ilə bağlı saxlanılanların məhkəmə prosesi keçirilib. Məhkəmə Aynur Elgünəş (Qənbərova), Aytac Tapdıq (Əhmədova), Natiq Cavadlı, Xəyalə Ağayeva, Aysel Umudova, Ramin Cəbrayilzadə (Deko) və Ülvi‌ Tahirov barəsində 4 aylıq həbs-qətimkan tədbiri seçib. Onlar Cinayət Məcəlləsinin 206.3.2-ci (qaçaqmalçılıq, bir qrup şəxs tərəfindən əlbir törədildikdə) maddəsi‌ ilə ittiham olunurlar.

Jurnalistlərin hamısı "qaçaqmalçılıq" ittihamını rədd edib və cinayət işini jurnalist fəaliyyətləri ilə əlaqələndiriblər. Onlar dekabrın 6-da saxlanmışdılar.

Xatırlatma

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bir çoxunun ittihamı ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 300-dən çox siyasi məhbus var.

Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Ermənistan parlamenti "Ermənistanın Avropa İttifaqına daxil olması prosesinin başlanması haqqında" qanun layihəsini ilk oxunuşda qəbul edib.

Qanun layihəsinin lehinə 63 deputat, əleyhinə isə 7 deputat səs verib.

Hakim partiyanın deputatlarının fikrincə, "bu layihə Avropa İttifaqına üzvlük üçün müraciət deyil, Avropa İttifaqına mesajdır, siyasi iradənin ifadəsidir".

Lakin müxalif "Ermənistan" fraksiyasının deputatlarının fikrincə, layihə "seçkilər ərəfəsində biabırçı blef, daxili siyasi məqsədlər üçün həyata keçirilən xarici siyasi avantüradır".

"Ermənistan" fraksiyası səsvermədə iştirak etməyib.

23 yanvar

Paşinyan: Böyük ehtimalla parlament Aİ-yə üzvlük layihəsini qəbul edəcək

Ermənistan parlamentində "Avropa İttifaqına üzvlük prosesinin başlanması haqqında" qanunvericilik təşəbbüsü hələ müzakirəyə çıxarılmasa da, baş nazir Nikol Paşinyan bu qanunun qəbul olunacağına inandığını bildirib.

Davosda keçirilən Dünya İqtisadi Forumunda iştirak edən Ermənistan hökumət başçısı panel müzakirəsində bu haqda məlumat verib.

"Əslində bu, vətəndaş cəmiyyətinin təşəbbüsü idi. Onlar Ermənistanın Avropa İttifaqına üzvlük prosesinə başlamaqla bağlı qanun layihəsi təqdim etdilər. Hökumətimiz bunu təsdiqlədi və parlamentimizin bu qanunu qəbul edəcəyi ehtimalı çox yüksəkdir. Bu, hüquqi baxımdan o deməkdir ki, biz Avropa İttifaqına daha da yaxınlaşmaq prosesinə başlayırıq. Niyə Avropa İttifaqına yaxın olmaq istəyirik? Çünki biz demokratik bir ölkəyik", – baş nazir bildirib.

Yanvarın 9-da hökumət Ermənistanın Avropa İttifaqına qoşulma prosesinə başlamaq haqqında qanun layihəsini təsdiqləyib. Layihənin müəllifləri Qərbpərəst "Avroreferendum" partiyasının üzvləridir. Onlar qanun layihəsini parlamentə təqdim etmək üçün qanunla tələb olunan 50 mindən çox imza toplamışdılar.

Moskva elə həmin gün Ermənistan hökumətinin bu qərarına reaksiya verib. Rusiya baş nazirin müavini bu addımı Avrasiya İqtisadi İttifaqından çıxışın başlanğıcı kimi gördüklərini və bu vəziyyəti nəzərə alaraq Yerevana qarşı iqtisadi siyasət hazırlayacaqlarını bəyan edib.

Türkiyə və Türkmənistan türkmən təbii qazının Türkiyəyə nəqlinin asanlaşdırılmasına dair saziş imzalayıblar. "Reuters" xəbər verir ki, bunu fevralın 11-də Türkiyənin energetika naziri Alparslan Bayraktar bildirib.

Nazirin sözlərinə görə, Türkiyənin dövlətə məxsus boru kəməri operatoru BOTAŞ ilə Türkmənistanın "Turkmengaz" şirkəti arasında bağlanmış saziş qaz axınının martın 1-dən başlanmasını hədəfləyir.

Türkiyə ildə 50 milyard kubmetrdən çox qaz istehlak edir. Ölkə qaz tələbatını Rusiya, Azərbaycan və İrandan boru kəməri vasitəsilə nəql olunan qazla yanaşı, müxtəlif tədarükçülərdən mayeləşdirilmiş təbii qaz (LNG) idxalı ilə qarşılayır.

"Uzun illər üzərində çalışdığımız bu anlaşma iki ölkə arasındakı strateji əməkdaşlığı daha da irəli aparacaq, eyni zamanda ölkəmizin və regionumuzun təbii qaz təchizatı təhlükəsizliyini gücləndirəcəyik", – nazir Bayraktar bəyanatında bildirib. O, daha əvvəl Türkiyənin Türkmənistandan illik 2 milyard kubmetr qaz ala biləcəyini bildirmişdi. Qazın İranın mövcud təbii qaz şəbəkəsi vasitəsilə nəql edilməsi gözlənilirdi.

Türkmənistan hökumətinin nümayəndəsi də ilkin mərhələdə ildə 2 milyard kubmetr qazın İran vasitəsilə tədarükünün mümkün olduğunu qeyd edib. O, həmçinin Türkmənistandan Azərbaycana və oradan Türkiyəyə qədər Xəzər dənizi dibindən qaz boru kəməri tikintisi ilə bağlı ayrıca layihənin də ölkələr arasında uzunmüddətli əməkdaşlıq çərçivəsində müzakirə olunduğunu bildirib.

Yeni saziş çərçivəsində tədarük ediləcək qazın həcmi və İran vasitəsilə tranzitin dəqiq şərtləri barədə ətraflı məlumat verilməyib.

Bu il sertifikatlaşdırmaya 22 min xarici dil müəllimi və ötən il uğur qazana bilməyən 4 min müəllim cəlb ediləcək.

Bunu fevralın 12-də Məktəbəqədər və Ümumi Təhsil üzrə Dövlət Agentliyinin (MÜDTA) direktoru Eşqi Bağırov jurnalistlərə açıqlamasında deyib.

Onun sözlərinə görə, 65 minə yaxın sertifikasiyaya cəlb olunmuş müəllimlərdən 55 mini bunu uğurla başa çatdırıb və onların maaşına əlavələr edilib: "Təxminən 5 min müəllim isə sertifikasiyadan keçə bilmədiyi üçün onların əmək müqaviləsinə xitam verilib".

2024-2025-ci tədris ili üzrə müsabiqədə ümumilikdə 6 min 211 şəxs işə qəbul olunub. Hazırda Azərbaycanda 150 mindən çox müəllimin olduğu bildirilir.

Xatırlatma

Azərbaycanda müəllimlər üçün sertifikatlaşdırma 2021-ci ildən aparılır. O, iki mərhələdən (test və müsahibə) ibarətdir. Bu prosesdən keçən müəllimlərin maaşlarına 10-35 faiz əlavələr olunduğu bildirilib.

Elm və Təhsil Nazirliyindən ötən il bildirilmişdi ki, təkrar sertifikatlaşdırmada uğursuz olan müəllimlərin müraciətlərinin qəbulu aparılır. "Keçid balını toplamayan təhsilverənlərlə işin təşkili, onların sosial statuslarının mərhələli şəkildə qiymətləndirilməsi və alternativ iş imkanlarının araşdırılması məqsədilə komissiyalar yaradılıb", - deyə vurğulanırdı.

Ukrayna prezidenti Volodimir Zelenski Ukrayna qüvvələri tərəfindən Rusiyanın Kursk bölgəsində ələ keçirilmiş ərazilərin Rusiya tərəfindən işğal olunmuş torpaqlarla mübadiləsini təklif etməyi planlaşdırdığını bildirib. Ukrayna prezidenti bunun ancaq əgər iki tərəf müharibəyə son qoymaq üçün danışıqlar masasına əyləşərsə, baş tuta biləcəyini qeyd edib.

"Biz bir ərazini başqa bir ərazi ilə dəyişəcəyik", – Zelenski "The Guardian" qəzetinə müsahibəsində bildirib. Lakin o, Kursk bölgəsinin bir hissəsi müqabilində Kiyevin Moskvadan hansı ərazini tələb edəcəyini bilmədiyini əlavə edib.

"Mən bilmirəm, buna baxacağıq. Amma bütün torpaqlarımız vacibdir, burada heç bir prioritet yoxdur", – Zelenski fevralın 11-də dərc olunan müsahibəsində deyib. O, əvvəllər Rusiyanın 2022-ci ildə genişmiqyaslı işğala başladıqdan sonra ələ keçirdiyi hər hansı Ukrayna ərazisindən imtina etməyə razı olmayıb.

Fevralın 14-də Münhen Təhlükəsizlik Konfransı çərçivəsində ABŞ-nin vitse-prezidenti Ceyms Devid Vens və digər amerikalı rəsmilərlə görüşəcək Zelenski ciddi danışıqlara hazır olduğunu vurğulayıb.

Prezident Zelenskinin sözügedən müsahibəsi Rusiyanın Kiyevə növbəti ölümcül raket zərbəsi endirməsinə saatlar qalmış dərc edilib.

"Pulumuzu geri istəyirəm"

Vaşinqtonun Kiyevə dəstəyini davam etdirməsinə şübhə ilə yanaşan ABŞ prezidenti Donald Tramp müharibənin həllinə çalışır və son günlər diplomatik səyləri artırıb.

Tramp ABŞ-nin Ukraynaya ayırdığı yardımların xərclərindən kəskin şikayətlənir və Vaşinqtonun bunun əvəzində nəsə tələb edəcəyini bildirib.

"Onlar razılığa gələ də bilərlər, gəlməyə də bilərlər. Onlar nə vaxtsa Rusiyanın bir hissəsi ola bilərlər. Olmaya da bilər. Amma pulumuz oradadır və mən onu geri istəyirəm", – Tramp fevralın 10-da "Fox News"a müsahibəsində bildirib.

Zelenski "The Guardian"a müsahibəsində deyib ki, ötən il o, Trampa müharibəni bitirmək üçün razılaşmanın bir hissəsi kimi Birləşmiş Ştatların Ukraynanın nadir torpaq minerallarına prioritet çıxış əldə etməsi ideyasını təklif edib.

Ukrayna prezidentinin sözlərinə görə, ölkəsi Avropanın ən böyük uran və titan ehtiyatlarına malikdir. Zelenski əlavə edib ki, o, Trampa bu ehtiyatların Rusiya nəzarətinə keçməsinin, Şimali Koreya, Çin və ya İranla paylaşılmasının Vaşinqtonun maraqlarına uyğun olmayacağını deyib.

Tramp son vaxtlar nadir torpaq minerallarının Ukrayna müharibəsi ilə bağlı mümkün razılaşmanın bir hissəsi ola biləcəyini vurğulayıb və ABŞ maliyyə naziri Skott Bessantın Ukraynaya gedərək bu resursları müzakirə edəcəyini deyib.

Zelenski həmçinin Ukraynanın təhlükəsizliyi üçün ABŞ-nin hərbi dəstəyinin davam etməsinin vacib olduğunu vurğulayıb.

"Amerikasız təhlükəsizlik zəmanətləri, real təhlükəsizlik zəmanətləri deyil", –Zelenski bildirib və yenidən ABŞ istehsalı olan "Patriot" hava hücumundan müdafiə sistemlərinin artırılması üçün çağırış edib.

ABŞ prezidenti Donald Tramp İranın nüvə proqramı ilə bağlı Tehranla razılaşmanın əldə olunacağına inandığını deyib. Prezident Tramp hesab edir ki, Tehran danışıqlar aparmağa və hərbi variantın gündəmə gələ biləcəyi gərginliyin qarşısını almağa istəklidir.

Fevralın 10-da "Fox News"a müsahibə verən ABŞ lideri deyib ki, İran rəsmiləri razılaşma əldə olunmazsa, mümkün nəticələrdən "narahat və qorxmuş" durumdadırlar.

"Hamı düşünür ki, İsrail bizim köməyimizlə və ya icazəmizlə gedib onlara ağır zərbələr endirəcək. Mən isə bunun baş verməməsini istərdim", – Tramp bildirib

"Siz İranın nüvə silahına sahib olmasına icazə verə bilməzsiniz, lakin onları dayandırmağın iki yolu var: bombalarla və ya yazılı kağız parçası ilə.... Məncə, İran saziş bağlamaq istərdi və mən də bombalamadan onlarla razılığa gəlmək istərdim", - Tramp əlavə edib.

O, razılaşmanın əhatə dairəsi barədə əlavə təfərrüat verməyib.

Ötən həftə İranın ali dini rəhbəri Əli Xamenei ABŞ ilə nüvə danışıqları perspektivini rədd edərək belə danışıqların İranın problemlərini çözməyəcəyini bildirib.

Fevralın 4-də Tramp İranın neft ixracına zərbə vurmaq və nüvə proqramını ləngitmək məqsədilə bu ölkəyə qarşı "maksimum iqtisadi təzyiq" siyasətini bərpa etmək üçün sərəncam imzalayıb. Tehran isə nüvə proqramının dinc məqsədlər üçün olduğunu iddia edir.

Fevralın 10-da prezident Donald Tramp ABŞ-yə idxal olunan bütün polad və alüminium məhsullarına 25 faiz tarif tətbiq olunduğunu elan edib.

O, alüminium üçün tarif dərəcəsini əvvəlki 10 faizdən 25 faizə yüksəltməklə yanaşı, həm də ölkə istisnalarını, kvota razılaşmalarını, hər iki metal üçün məhsula xas tarif istisnalarını ləğv edən fərmanlar imzalayıb.

Ağ ev rəsmisi qərarların martın 4-dən qüvvəyə minəcəyini bildirib.

Yeni tariflər əvvəllər istisnalar çərçivəsində Birləşmiş Ştatlara Kanada, Braziliya, Meksika, Cənubi Koreya və digər ölkələrdən rüsumdan azad şəkildə gətirilən milyonlarla ton polad və alüminium idxalına şamil ediləcək.

Tramp Ağ evdə jurnalistlərə bildirib ki, bu addım metallara tətbiq olunan tarifləri sadələşdirəcək. "Bu, istisna və ya güzəştlər olmadan 25 faizdir. Mənşəyindən asılı olmayaraq, bütün ölkələrə şamil olunur", –o vurğulayıb.

Tramp ABŞ ilə ticarət kəsiri səbəbindən Avstraliyanın polad tariflərindən azad olunmaq tələbinə "xüsusi diqqətlə" yanaşacağını bildirib.

Prezidentin ticarət müşaviri Piter Navarro isə son tədbirlərin ABŞ-nin polad və alüminium istehsalçılarına dəstək olacağını, həmçinin ölkənin iqtisadi və milli təhlükəsizliyini gücləndirəcəyini söyləyib: "Bu, yalnız ticarətlə məhdudlaşmır. Məqsəd, ABŞ-nin polad və alüminium kimi strateji sahələrdə xarici ölkələrə möhtac qalmamasını təmin etməkdir".

Mütəxəssislər isə hesab edir ki, bu tariflər qlobal iqtisadiyyatda dalğalanmalara səbəb ola bilər.

ABŞ hökuməti və Amerika Dəmir və Polad İnstitutunun məlumatlarına görə, ölkəyə ən çox polad idxal edən dövlətlər Kanada, Braziliya və Meksika, daha sonra isə Cənubi Koreya və Vyetnamdır.

İlk prezidentlik müddətində Tramp polad idxalına 25 faiz və alüminiuma 10 faiz tariflər tətbiq edib, lakin daha sonra ABŞ-nin bəzi ticarət tərəfdaşlarına - Kanada, Meksika və Braziliyaya rüsumsuz ticarət kvotası verib. Trampdan sonra prezident Co Bayden bu kvotaları Böyük Britaniya, Yaponiya və Avropa İttifaqına da şamil edib.

Aİ: Əsaslandırılmamış tariflər cavabsız qalmayacaq

Avropa Komissiyası ABŞ prezidenti D.Trampın yeni tariflərlə bağlı qərarına münasibət bildirib.

Avropa Komissiyasının rəsmi saytında komissiyanın prezidenti Ursula Fon der Lyayenin adından bəyanat dərc olunub.

Bəyanatda Fon der Lyayen ABŞ-nin Avropadan idxal olunan polad və alüminiuma tarif vergisi tətbiq etmək qərarından "dərin təəssüf hissi" keçirdiyini bildirib.

"Tariflər vergilərdir - biznes üçün pis, istehlakçılar üçün daha pis. Avropa İttifaqına tətbiq olunan əsaslandırılmamış tariflər cavabsız qalmayacaq - onlar qəti və mütənasib əks tədbirlərə səbəb olacaq. Avropa İttifaqı öz iqtisadi maraqlarını qorumaq üçün hərəkətə keçəcək. Biz işçilərimizi, müəssisələrimizi və istehlakçılarımızı qoruyacağıq", - açıqlamada vurğulanır.

Fevralın 10-da Yelisey sarayında Ermənistanın baş naziri Nikol Paşinyanın Fransa prezidenti Emmanuel Makron ilə görüşü olub.

Ermənistan hökuməti mətbuat xidmətinin məlumatına görə, Makron Ermənistan və Fransa arasında çoxsahəli əməkdaşlığın daha da inkişaf etdirilməsinin vacibliyini vurğulayıb, Ermənistanın inkişafı və sabitliyinin təmin olunması işində Fransanın dəstəyini bir daha təsdiqləyib.

Paşinyan səmimi qəbula görə minnətdarlığını bildirib və qeyd edib ki, 2024-cü il Ermənistanla Fransa arasında münasibətlərdə son dərəcə dinamik il olub. Onun sözlərinə görə, iki ölkənin rəhbərləri və müvafiq idarələr səviyyəsində bir çox görüşlər keçirilib, müntəzəm təmaslar davam etdirilir və hazırda Ermənistan-Fransa münasibətləri yeni səviyyəyə yüksəlib.

İki ölkə liderləri iqtisadiyyat, infrastruktur, yol tikintisi, energetika, təhsil və turizm kimi sahələrdə ikitərəfli əməkdaşlığın inkişafını, birgə layihələrin reallaşdırılması perspektivlərini müzakirə ediblər.

Tərəflər Ermənistan və Azərbaycan arasında sülh prosesinə, sərhədlərin demarkasiyası prosesinin inkişafına və "Sülh kəsişməsi" layihəsi çərçivəsində regional kommunikasiyaların açılmasına da toxunublar. Paşinyan Ermənistan hökumətinin sülh gündəminə sadiqliyini vurğulayıb. Regional əhəmiyyətli bir sıra digər məsələlər də müzakirə olunub.

Bundan əlavə, Ermənistan və Avropa İttifaqı arasında gələcək əməkdaşlığın perspektivləri, eləcə də Ermənistanda demokratik islahatların təşviqi ilə bağlı fikir mübadiləsi aparılıb.

N.Paşinyan Parisdə ikigünlük işgüzar səfərdədir, o burada süni intellekt məsələləri üzrə sammitdə iştirak edəcək.

Son illər Azərbaycan və Fransa arasında müəyyən gərginlik müşahidə edilir. Azərbaycan Fransa hökumətini onunla Qarabağ məsələsi ilə bağlı uzun illərdir münaqişədə olan Ermənistanı himayə etməkdə, onu silahlandırmaqda günahlandırır. Fransa rəsmiləri Azərbaycan və Ermənistan məsələsində tərəf tutmaqları ilə bağlı iddiaları qəbul etmirlər, sadəcə regionda sabitlik istədiklərini bildirirlər.

Xatırlatma

Ötən əsrin 90-cı illərinin əvvəllərində Qarabağ münaqişəsi Azərbaycanla Ermənistan arasında toqquşmalar doğurub. O dövrdə Azərbaycanın Qarabağ bölgəsi və civarındakı 7 rayon işğal edilmişdi.

Azərbaycan 2020-ci ildə 44 günlük müharibə və 2023-cü ildə birgünlük əməliyyatla ərazi bütövlüyünü bərpa edib. Son bir neçə ildə hər iki ölkə arasında həm Avropa İttifaqı, həm də Rusiyanın vasitəçiliyi ilə ayrıca danışıqlar aparılsa da, hələlik, sülh sazişi imzalanmayıb.

Tərəflər 2023-cü ildən sərhədlərin delimitasiyasına dair birbaşa danışıqlara başlayıblar.

Rusiya Dövlət Dumasının Turizm komitəsinin sədrinin birinci müavini Nikolay Valuyevin adı Azərbaycana girişi qadağan olunmuş şəxslərin siyahısına daxil edilib.

Bunu yerli mediaya açıqlamasında Azərbaycan Xarici İşlər Nazirliyinin mətbuat katibi Ayxan Hacızadə deyib.

A.Hacızadənin sözlərinə görə, N.Valuyevin Azərbaycana qarşı "təhdid xarakterli" fikirləri tamamilə qəbuledilməzdir.

"Təəssüflə bildirmək istərdik ki, ölkəmizə qarşı fəaliyyət göstərən bütün bu deputatlar məhz Rusiyanın hakim "Vahid Rusiya" partiyasının üzvləridir", - A.Hacızadə vurğulayıb.

Azərbaycan tərəfi "Rossotrudniçestvo"nun Bakıdakı nümayəndəliyinin (Rus Evi) fəaliyyətini dayandırması barədə Rusiyaya nota göndərdikdən sonra Valuyev Bakının qərarını tənqid edib.

"Rusiyada "Azersotrudniçestvo" kimi bir qurum mövcud deyil. Amma bunun əvəzində çox sayda "diasporlar" var. Bu diasporlar mədəni mübadilə ilə əlaqəli deyil, daha çox pulla əlaqəlidir. Və böyük miqyasda. Bu, təkcə Rusiyada deyil, həm də tarixi vətəndə son dərəcə zəruridir. Bu pullar, bunu necə daha ehtiyatla ifadə etsəm, heç də həmişə qanuni deyil... Onlara daha yaxından nəzər salmağın vaxtı çatmadımı?", –rusiyalı deputat öz Telegram kanalında sual edib.

7 fevral

Kreml Putinlə Əliyevin Rus Evi ilə bağlı müzakirə aparacağını istisna etmir

Bakıdakı Rusiya İnformasiya və Mədəniyyət Mərkəzi (Rus Evi) ətrafında yaranmış vəziyyət Rusiya və Azərbaycan prezidentləri arasında təmaslar baş tutduqda müzakirə oluna bilər.

TASS xəbər verir ki, bu ehtimalı Rusiya prezidentinin mətbuat katibi Dmitri Peskov brifinqdə səsləndirib.

"Biz buna təəssüf edirik. Hesab edirik ki, bu anlaşılmazlıqdır və ikitərəfli təmaslarla həll oluna bilər", - Peskov Rusiya Evinin bağlanmasını şərh edərkən bildirib.

"Əlbəttə, biz bu məsələni həmkarlarımızla müxtəlif səviyyələrdə qaldıracağıq. Əgər ən yüksək səviyyədə təmaslar olarsa, istisna etmirik ki, bu məsələ iki dövlət başçısı arasında dialoqda müzakirə oluna bilər", - Kremlin sözçüsü Putinlə Əliyev arasında bu mövzuda təmasların olub-olmayacağı ilə bağlı suala cavabında bunları bildirib.

6 fevral

Azərbaycan Rus Evi ilə bağlı Rusiyaya nota göndərib

Azərbaycan Xarici İşlər Nazirliyi (XİN) Rusiya İnformasiya və Mədəniyyət Mərkəzinin (Rus Evi) Bakıda qeydiyyata alınması tələbi ilə Rusiya XİN-ə nota göndərib.

Vesti.ru xəbər verir ki, bu barədə "Rossotrudniçestvo"nun rəhbəri Yevgeni Primakov "Rossiya 24" telekanalının efirində bildirib: "Notada deyilir ki, bizim nümayəndəliyimiz, Rusiya İnformasiya və Mədəniyyət Mərkəzi yerli qanunvericiliyə əsasən hüquqi şəxs kimi qeydiyyatdan keçməlidir".

Primakovun sözlərinə görə, Rusiya dəfələrlə Bakıdan qeydiyyatla bağlı kömək istəyib, lakin cavab almayıb.

XİN təsdiqləyir

"Azərbaycan ərazisində bu kimi təşkilatların fəaliyyəti milli qanunvericiliyə, ölkələr arasında qarşılılıq prinsipinə və ikitərəfli əsasda əldə olunmuş razılıqların tələblərinə uyğun tənzimlənir". Bunu Azərbaycan Xarici İşlər Nazirliyinin (XİN) mətbuat katibi Ayxan Hacızadə "Rossotrudniçestvo" agentliyi ilə bağlı yerli medianın sualına cavabda deyib. Onun sözlərinə görə, "Rus Evi"nin hüquqi şəxs qismində qeydiyyatının mövcud olmadığı və Azərbaycan qanunvericiliyini ciddi şəkildə pozduğu barədə məlumat verilib. Bu il fevralın 3-də isə onun fəaliyyətinə xitam verilməsi barədə Rusiyaya nota göndərilib.

Sözçü Rusiyadan bu qərara uyğun tədbirlər gözlənildiyini vurğulayıb.

28 yanvar

Rusiya səfiri də Azərbaycan XİN-ə çağrılıb

Yanvarın 28-də Rusiya Federasiyasının Bakıdakı fövqəladə və səlahiyyətli səfiri Mixail Yevdokimov Azərbaycan Xarici İşlər Nazirliyinə (XİN) dəvət olunub.

Azərbaycan XİN bildirir ki, görüş zamanı Rusiya mətbuatında, eləcə də bəzi rəsmi dairələri tərəfindən "dezinformasiya xarakterli", onları "hədəf alan" yazıların dərc olunmasının anlaşılmazlıq yaratdığı, iki ölkə arasında 3 il əvvəl imzalanan "Müttəfiqlik qarşılıqlı fəaliyyəti haqqında Bəyannamə"nin məzmun və ruhuna zidd olduğu diqqətə çatdırılıb: "AZAL-a məxsus təyyarənin qəzaya uğraması ilə bağlı ilkin təhqiqatın nəticələrinin məlum olduğu, istintaqın yekunlaşdırılması üçün iş aparıldığı, qəza ilə bağlı Rusiyadan gözləntilərimizin açıq şəkildə bəyan edildiyi xatırlanıb".

Açıqlamaya görə, yerli mətbu orqanında "Rus evi" ilə bağlı məlumata gəldikdə, bunun rəsmi mövqe olmadığı, bu kimi təşkilatların fəaliyyətinin qarşılılıq prinsipinə əsaslandığı və qanunvericiliyin tələblərinə uyğun aparılmasının vacib olduğu bildirilib.

27 yanvar

Azərbaycan səfiri Rusiya XİN-ə çağrılıb

Rusiya Xarici İşlər Nazirliyi (XİN) bildirib ki, yanvarın 27-də Azərbaycanın fövqəladə və səlahiyyətli səfiri Rəhman Mustafayevi bu quruma dəvət ediblər və nazir müavini Mixail Qaluzin onunla görüşüb.

XİN-in məlumatına görə, görüş zamanı nazir müavini "Rusiya və Azərbaycan arasında strateji tərəfdaşlıq və müttəfiqlik ruhunda əlaqələrin qurulmasının mütləq əhəmiyyətini vurğulayıb".

Açıqlamaya görə, görüşdə habelə "Azərbaycan mətbuatında son vaxtlar Rusiya əleyhinə olan silsilə yazılar, eləcə də Bakıda Rus Evinə qarşı aparılan dezinformasiya kampaniyası ilə bağlı təəccüb ifadə olunub".

Bugünlərdə hakimiyyətyönlü "Baku TV" peyk telekanalında Bakıda yerləşən "Rus Evi" mədəniyyət mərkəzi ilə bağlı reportaj efirə gedib. "Rus Evi, yoxsa daha çox rus kəşfiyyatı evi" adlı süjetdə bu qurumun fəaliyyəti ilə bağlı bir sıra iddialar yer alıb. Rusiya XİN bildirib ki, Mixail Qaluzin bu iddiaları "tamamilə əsassız" adlandırıb.

Görüşdə həmçinin 2024-cü il dekabrın 25-də Qazaxıstanın Aktau şəhəri yaxınlığında AZAL-a məxsus sərnişin təyyarəsinin qəzaya uğraması da müzakirə olunub. "Faciənin bütün detallarının aydınlaşdırılması üçün rəsmi araşdırmanın başa çatdırılması və nəticələrinin dərc edilməsinin zəruriliyi vurğulanıb", -Rusiya XİN bildirib.

Xatırlatma

Dekabrın 25-də Bakı-Qroznı marşrutu ilə uçan AZAL təyyarəsi Aktauda qəza enişi edib. Təyyarədəki 67 nəfərdən 38-i həlak olub, 29 nəfər sağ qalıb.

Azərbaycan prezidenti İlham Əliyev yerli mediaya deyib ki, sərnişin təyyarəsi Rusiyanın hava məkanında kənar fiziki-texniki müdaxiləyə məruz qalıb, idarəetməni tam itirib, Qazaxıstanın Aktau şəhərinə yönləndirilib və yalnız pilotların şücaəti, peşəkarlığı sayəsində qəza enişi edə bilib.

Rusiya prezidenti Vladimir Putin azərbaycanlı həmkarına zəng edərək başsağlığı verib və hadisənin Rusiya səmasında baş verdiyinə görə üzr istəyib. Ancaq Rusiya hadisə ilə bağlı məsuliyyəti öz üzərinə götürməyib.

Azərbaycan həm məsuliyyətin müəyyən olunması və həm də kompensasiya ödənilməsini tələb edir.

Rumıniya prezidenti Klaus Yohannis müxalifətin onu impiçment etmək üçün cəhd göstərdiyi bir dövrdə istefa verdiyini açıqlayıb.

"Rumıniyanı bu böhrandan xilas etmək üçün prezident vəzifəsindən istefa verirəm", - o, emosional çıxışında bildirib və fevralın 12-də vəzifəsindən gedəcəyini əlavə edib.

65 yaşlı prezident 2014-cü ildən bu vəzifədədir və iki beşillik müddətini tamamlamışdı. Ancaq dekabrda sağçı və Rusiya tərəfdarı olan Kalin Corceskunun gözlənilmədən prezident seçkisinin birinci turunda qalib gəlməsinin ardından Konstitusiya Məhkəməsi səsvermənin nəticələrini ləğv etmiş və Yohannisdən dekabrın ortalarında başa çatan prezidentlik müddətindən sonra da səlahiyyətlərinə davam etməsini istəmişdi.

Məhkəmə müstəqil namizəd olaraq çıxış edən Corceskunun, ehtimal, Rusiya tərəfindən təşkil olunan sosial media (TikTok) kampaniyasından faydalandığını göstərən təhqiqat sənədlərinə istinad etmişdi. Moskva isə seçkilərə müdaxiləni inkar edib.

Prezident Yohannisin istefası təsdiqləndikdən sonra Senatın lideri İlie Bolojan müvəqqəti olaraq prezident vəzifəsini icra edəcək.

Rumıniyada yeni prezident seçkisi mayın 4-də keçiriləcək.

"Talış Milli Akademiyasının xəbərləri"nin baş redaktoru İqbal Əbilovun işi üzrə ibtidai istintaq başa çatıb. Bu barədə vəkili Fariz Namazlı bildirib. Onun sözlərinə görə, Əbilovun özü və vəkilləri artıq işin materialları ilə tanış olublar.

Gələn həftə (17-23 fevral) cinayət işinin baxılması üçün Bakı Ağır Cinayətlər Məhkəməsinə göndəriləcəyi gözlənilir.

23 yanvar

Hilal Məmmədov DTX-ya çağırılaraq dindirilib

Yanvarın 23-də ictimai fəal, "Tolışi sədo" (Talışın səsi) qəzetinin keçmiş redaktoru Hilal Məmmədov Dövlət Təhlükəsizliyi Xidmətində (DTX) şahid kimi ifadə verdiyini bildirib.

Onun sözlərinə görə, dövlətə xəyanətdə ittiham edilən İqbal Əbilovun işində şahid qismində dindirilib.

H.Məmmədov İ.Əbilovun günahsız olduğuna inanır: "Azərbaycanın belə görkəmli ziyalıları öz elmi tədqiqatlarını davam etdirmək üçün həbsxanada yox, azadlıqda olmalıdırlar".

O qeyd edib ki, sorğu-sual təxminən iki saat sürüb, onunla rəftar nəzakətli olub.

Onun açıqlamasına DTX-dən münasibət almaq mümkün olmayıb.

Belarusda yaşayan İ.Əbilov ötən il iyulun 22-də Azərbaycana qohumlarının yanına gələrkən saxlanıb. Ona qarşı Cinayət Məcəlləsinin 274 (dövlətə xəyanət), 281.3 (xarici təşkilatların və ya onların nümayəndələrinin tapşırığı ilə dövlətə qarşı yönəlmiş ictimai çağırışlar) və 283.1-ci (milli, irqi, sosial və ya dini nifrət və düşmənçiliyin qızışdırılması) maddələri ilə ittiham irəli sürülüb. Əbilov ittihamları rədd edir və yalnız elmi fəaliyyətlə məşğul olduğunu bildirir.

36 yaşlı İ.Əbilov virtual "Talış Milli Akademiyası"nın mətbu orqanı olan "Talış Milli Akademiyasının xəbərləri"nin baş redaktorudur. Saytda talış folklor nümunələri, talışlarla bağlı nəşr olunmamış tarixi sənədlər, tədqiqatlar dərc edilib.

İ.Əbilov 2012-ci ildə Belarus Dövlət Universitetinin beynəlxalq münasibətlər ixtisası üzrə bakalavriatını, 2013-cü ildə isə magistraturasını bitirib. 2016-cı ildə həmin universitetin aspiranturasına daxil olub.